Рақобат тўғрисидаги қонуннинг янги таҳрири Сенат томонидан маъқулланганидан тўрт ой ўтиб (!) имзоланди Ниҳоят, Рақобат тўғрисидаги қонуннинг янги таҳрири имзоланди ва энди қонун 3 ойдан кейин амал қилишни бошлайди. Мазкур қонуннинг имзоланиши жараёни чўзилиб кетгани ва бунда Янги ва Эски Конституция нормаларига очиқчасига амал қилинмагани ҳақида жуда кўп ёздик. Қайта ва қайта эслатдик. Ҳечдан кўра кеч. Энди унга амал қилишни бошлаш керак. Чунки Янги Ўзбекистонда муаммо қонуннинг йўқлиги эмас, унга амал қилмаслик ва ошкора тупуриб қўйиш ҳисобланади. Шу ўринда қонун ижодкорлиги жараёни очиқ бўлиши ҳақида ҳам гапиравериб чарчадик. Қонун лойиҳаси Қонунчилик палатасига келиб тушгандаёқ унинг матни очиқ эъдон қилиниши керак. Биринчи ўқишдан кейинги матн яна эълон қилиниши керак. Иккинчи ва учинчи ўқишдан кейинги ўзгарган матн ҳам. Сенатга юборилган қонун матни очиқланиши зарур. Имзоланишга юборилган қонун матни очиқланиши зарур. Токи Ўзбекистон фуқаролари Қонун дойиҳасидан имзолангунча даврда нима ва қандай ўзгаришлао бўлганини билсин. Ўзбекистонликлар бунга ҳақли. Ахборот замонида шу иш шунчалар қийинми? Ё хоҳиш йўқми? Қонунлар имзога киргунча тор манфаатлар йўлида ўзгариб кетиши ё ойлаб қайсидир чиновникнинг тортмасида ётиши нормал ҳолат эмас.