Сўралганидан ортиқ кредит бериш амалиёти чекланади Охирги йилларда авж олаётган кўргазмали истеъмолга муккасидан кетиш ва бунинг учун кредит олиш вос-воси фонида айрим банклар сўралганидан ортиқча суммада кредит таклиф этиш амалиётини қўллашга ўтиб олишган эди. Етарли тайёргарликка ва ҳисоб-китобга эга бўлмаган қарздорлар учун, албатта, бу заруриятсиз ва самарасиз сарф-харажатларга ундаш дегани. Яъни бу хўрак эмас, қопқон. Марказий банк таклиф этаётган лойиҳага кўра, истеъмолчиларга кредит олиш бўйича аризасида (сўровида) кўрсатилган миқдордан ортиқча суммада кредит таклиф этган ҳолда уни олишга ундаш каби инсофсиз хизмат кўрсатиш амалиётларининг қўлланилишига йўл қўйилмайди. Шунингдек, эндиликда кредит олувчилар худди тамаки ва алкоголь маҳсулотларининг зарарли оқибати ҳақида огоҳлантирилганликлари каби хатарлар чек-листи билан танишишлари ва имзолашлари керак.