Фақат арзон буғдой туфайли охирги 2 йилда ун ва нон нархлари барқарор қолмоқда Марказий банк таҳлилларига кўра, 2020 йилдан 2025 йил май ойига қадар ун 73,5%гача, нон 77,6%гача қимматлаган. Нархларнинг энг юқори сакраши буғдой ҳосили яхши бўлмаган, Россиянинг Украинага босқини юз берган ва нархлар эркинлаштирилган 2022 йилга тўғри келган. Буғдойнинг глобал ва ички нархлари 2022 йилдан буён кескин ва каррасига арзонлашганига қарамай, ун ва нон нархи ўсишдан тўхтамаган. Ёқилғи-энергетика, транспорт, коммунал тарифларининг юқори ўсиши буғдой арзонлашиши эффектини ноллаштириб юборган. 2023/2024 мавсумида Ўзбекистон буғдой балансида импортга қарамлик 32%ни ташкил этган. 2024 йилда буғдой тоннаси ўртача 190 доллардан импорт қилинган. Импортнинг (3,6 млн.тоннадан ортиқ) 99%и Қозоғистон ҳиссасига тўғри келади. Ўзбекистоннинг буғдой ва ун экспорти ҳам ошиб бормоқда. Экспортимизнинг 94%дан ортиғи (2,3 млн.тонна) Афғонистонга тўғри келади. Ўзбекистонликларнинг буғдой ва ун истеъмоли дунёда энг юқори кўрсаткичлардан бири ҳисобланади (йилига жон бошига 150 кило атрофида).