Ўзбекистондаги энг шарманда қурилиш компанияси Буни алоҳида ёзиб қўйиш керак. Тошкентда 7 июнь куни 195 кишида коронавирус аниқланган эди. Ўша вақт учун бу энг катта антирекорд эди. Касалланиш кўрсаткичининг бирдан бундай ўсишига сабаб бўлган ўчоқ расман айтилмади. Миш-миш чиқди: Дўрмон йўлидаги турар жой мажмуаларидан бирини қураётган қурилиш компанияси қурувчиларимиш. Тошкент ҳокимлиги ССВни кўрсатди (коронавирус билан боғлиқ барча ахборот бўйича ҳамма ССВга орқа қиладиган бўлган), ССВ айтолмади. Миш-мишда номи айтилган қурилиш компаниясининг воизи эса касаллик уларнинг қурилиш майдончасида чиқмагани устида салкам қасам ичди: «Чиқса, мен ҳам аллақачон карантинда бўлардим-у», деб, қўшимчасига. Орадан беш кун ўтиб Санитария-эпидемиология осойишталик агентлиги директори биринчи ўринбосари Ботиржон Қурбонов 195 ҳолатнинг 183 таси битта муассасада ишлаётган қурувчиларда чиққанини, бироқ «компанияга зарар етказиши мумкинлигини ҳисобга олган ҳолда» унинг номини айтмаслигини билдирди. Шундай ҳам шармандагарчилик бўладими ахир? Ўзини ҳурмат қилган аксарият муассасалар, компаниялар уларнинг ходимларида коронавирус аниқланганида ўзлари баёнот берди. Масалан, «Равнақбанк» ёки «София» қандолатчилик уйи (ҳозирги инфошумда кўзим тушганлари, аслида кўпроқ — ҳаммасига раҳмат!). Лекин 183 та қурувчисида коронавирус чиққан Тошкентдаги девелопер ҳали ҳам гапиргани йўқ. Яна такрорлайман — ўзини ва, табиийки, мижозларини қуруқ гапда эмас, ҳақиқатан ҳам ҳурмат қилган компания ёллаган 183 ишчисида касаллик чиққанида, буни айтган бўларди. Миш-мишларда номи айтилган компания реклама материалларига қарасанг, у гўёки Ўзбекистондаги энг зўр, энг илғор, энг замонавий компания, унақаси бошқа йўқ. Лекин қўрқоқ ва шарманда. Миш-мишларда номи айтилган ўша шарманда ва қўрқоқ компаниянинг шарманда ва қўрқоқлиги жуда катта фожиа эмас, чунки у компания тарихида бундан-да баттар шарафсизликлар бўлган, эҳтимол. Фожиа шундаки, «коронавирусга қарши кураш модели бутун дунё томонидан эътироф этилган», «ЖССТ томонидан бошқаларга намуна қилиб кўрсатилаётган» давлат ўша компания номини айтолмади. Берилаётган таърифларни ўқисанг, қўшниларига ёрдамларини кўрсанг, бир қудратли давлат деб ўйлайсан, лекин ўша давлат шугина бир компания олдида ожиз. Даҳшат. PS. Балки касаллик номи миш-мишда айланган компаниянинг қурилиш майдончасида чиқмагандир. Чунки расман буни ҳеч ким тасдиқламади. Инкор ҳам қилмади. Шунинг учун... Давлат ожизлик қилган компания олдида мен кимман, ватандош? Шўримиз қурсин.