ESG рейтингда юқори ўрин: UZTELECOM глобал стандартларга интилилмоқда ESG рейтинги бўйича 73 балл. Халқаро Sustainable Fitch рейтинг агентлиги томонидан UZTELECOMга берилган ушбу баҳо амалда Марказий Осиёда юқори кўрсаткич ҳисобланади. Жаҳон миқёсидаги мазкур эътироф UZTELECOMнинг экологик, ижтимоий ва корпоратив бошқарув соҳасида илғор халқаро амалиётларни фаолиятга изчил жорий этаётганлигини билдиради. ESG рейтинги бўйича юқори кўрсаткич Компанияга халқаро инвесторлар ва ҳамкорлар ишончининг ортиши, “яшил” ва барқарор молиявий инструментлардан фойдаланишда кенг имкониятлар яратиш билан бирга, БМТнинг Барқарор Ривожланиш Мақсадларини татбиқ қилишда Компания ҳиссасининг алоҳида эътироф этилишига хизмат қилади. Қолаверса, ушбу юқори рейтинг нафақат Компания, балки халқаро молия ва бизнес ҳамжамияти учун ҳам муҳим кўрсаткичдир. Бу эса мамлакатимизнинг глобал стандартларга мувофиқ барқарор келажакка интилиши ва инвестициялар учун тобора жозибадор майдонга айланиб бораётганлигини англатади. Маълумот учун: Sustainable Fitch – дунёнинг етакчи рейтинг агентликларидан бири ҳисобланган Fitch Ratings’нинг ихтисослашган бўлими бўлиб, компанияларни асосий учта йўналиш бўйича баҳолайди: • Экология (E) – карбонат ангидрид газларини самарали бошқариш, энергиядан оқилона фойдаланиш ва барқарор ресурслардан фойдаланиш амалиётлари; • Ижтимоий соҳаси (S) – ходимлар ҳуқуқларини ҳимоя қилиш ва инсон капиталини ривожлантириш; • Бошқарув (G) – очиқлик ва шаффофликни таъминлаш, ҳисобдорлик ҳамда самарали менежментни йўлга қўйиш. Реклама