Йирик солиқ тўловчига айланган Boston consulting Gid license Plate феномени ҳақида нима дейди? Ўзбекистонда ҳукумат, давлат идоралари ва компаниялари учун бошқарув консалтинг хизматларини кўрсатиб келаётган Boston Consulting Group 2025 йил 9 ойи якунлари билан хизмат кўрсатиш сегментида йирик солиқ тўловчилар қаторига кирган ва 97,4 млрд.сўмлик солиқ тўлаган (эҳтимолки, бир неча юз миллиард сўмлик буюртмалардан ҚҚС тўланган ). 2017 йилдан буён Ўзбекистондаги нефть-газ, кон саноати, кимё, транспорт ва логистика, қишлоқ хўжалиги соҳаларида иштирок этаётган ва Ўзбекистон ҳукуматидан жуда кўп буюртмалар олаётган глобал консалтинг компанияси 2022 йилда Тошкентда офис очган. Компания жорий йилда 2035 йилгача энергетикани ривожлантириш бўйича Мастер режани ишлаб чиққани маълум, лекин Мастер-режа эълон қилинмаган (Boston Consulting Group тайёрлаган аввалги лойиҳалар бўйича таҳлилий ва маслаҳат шарҳлари ҳам эълон қилинмаган). Ҳеч кимга берилмаётган хос ахборотлар ва ёпиқ маълумотлар билан ишлаётган Boston Consulting Group'нинг масалан, ўзбекистонликлар учун мистер иксга айланган Gid License Plate МЧЖ ҳақидаги хулосалари қизиқ бўларди. 2024 йилнинг 9 ойида 524,7 млрд.сўм солиқ тўлаган Gid License Plate МЧЖ 2025 йил давомида бирон марта йирик солиқ тўловчилар рўйхатида қайтиб кўрсатилмаган. Gid License Plate МЧЖ йирик солиқ тўловчилар рўйхатига тушган 2024 йил февралдан декабргача бўлган инфографик маълумотлар Солиқ қўмитасининг Fiskal tahlillar телеграм каналидан ўчириб ташланган (лекин интернетдан одатда ҳеч нарса ўчмайди).