Ҳавони ифлослантиргани учун Texnopark'ни жазолашипти, аждарҳо божлар ҳам бекор бўладими? Texnopark МЧЖга тегишли чўян қуйиш цехининг атмосфера ҳавосига зарарли таъсирини ўрганган Махсус комиссия ушбу саноат корхонасида чанг-газ тозалаш ускунаси мавжудлиги, бироқ ушбу тозалаш ускунаси белгиланган меъёрлардан ортиқча ифлослантирувчи моддаларни атмосфера ҳавосига чиқараётганлигини аниқлаган. Шунингдек, бу борада ҳеч қандай экологик экспертиза хулосаси берилмаганлиги маълум бўлган (қаранг-а, шаҳарнинг қо-оқ ўртасида улкан корхона экологик экспертизасиз ишлаб келган). Texnopark МЧЖ 100% шаҳар ҳокимиятига тегишли, Artel бренди остида фаолият юритувчи компаниялар гуруҳига ишончли бошқарувга берилган. Ҳартугул, экологик талаблар Texnopark МЧЖга ҳам етиб келиптими, бу яхши сигнал. Кейинги қадамда Ўзбекистонда маиший техникалардан тортиб, лифт ва эскалаторларгача турли импорт бож ва маъмурий-бюрократик тўсиқлардан энг катта манфаатдорлардан ҳисобланувчилар чўнтаги учун киритилган аждарҳо божларни бекор қилиш масаласи ҳам кун тартибига чиқиб қолар.