"Технопарк" ишончли бошқарувга берилдими? Диёр Имомхўжаевнинг охирги интервьюсини кўрган одамки, ҳатто у футбол мухлиси бўлса ҳам, "Ишончли бошқарув" деган чиройли ёрлиқ аслида қандай "сиздан угина, биздан бугина" жараёндан иборат эканини тушунади. Ишончли бошқарув бу футбол клубими, заправкалар тармоғими, металлургия заводими ё Иссиқлик электр станциясими, харажатини давлатга юклаб, фойдасини чўнтакка уришни кўзда тутадиган "прихватизация схемаси". Лекин охирги йиллардаги шунча ёмон тажрибага қарамай, ўзбек чиновниклари йирик активларни ишончли бошқарувга беришдан ўзини тия олмаётгани сабаблари шахсан менга жуда қизиқ. Кейинги кунларда, айниқса маиший техника импортига нисбатан эълон қилинган ва қилинмаган янги чекловларни кучайтириш ҳаракатлари бошлангач, де-юре Тошкент шаҳар ҳокимияти 100%лик улушини назорат қиладиган, кўпчиликка газ счетчиклари билан машҳур "Технопарк" МЧЖ маиший техника ишлаб чиқарувчилардан бирига "ишончли бошқарув"га берилгани ҳақида маълумотлар пайдо бўлмоқда. На Давактив, на ҳокимият шу вақтгача "Технопарк"нинг ишончли бошқарувга берилгани бўйича очиқ ахборот тақдим этмаган. Балки бу битим худди Ангрендаги ИЭСлар билан бўлгани каби ёпиқ қарор билан амалга оширилган бўлиши ҳам мумкин (кейинчалик, орадан бир неча йил вақт ўтиб, ундаям ўта оғир молиявий аҳволга туширилган ИЭСлардан бири давлат назоратига қайтарилгач, тан олинган). Маълумот учун, "Технопарк" МЧЖга илгари Quality Electronics АЖ ва Dream Production МЧЖда (Artel брендига аффилланган, ҳозирда тугатилган) директор лавозимида ишлаган Сарвар Ахадов раҳбарлик қилиб келмоқда. "Технопарк" МЧЖ цехларида давлат буюртмаси бўйича газ счетчикларидан ташқари холодильниклар, радиаторлар, кондиционерлар, сув иситгичлар, насослар, кир ювиш машиналари йиғилади. Кечадан бошлаб ушбу маҳсулотларни ўз ичига олган 13 турдаги маиший техника импортига нисбатан қатор чекловларни назарда тутадиган қоидалар расман кучга кирди.