Энди нима бўлади? Кўпчиликда шунақа тасаввурки, ўтган ҳафтада кун тартибига чиққан кетма-кет баҳслардан кейин, гўёки мунозара тугади, кўтарилган чанг босилди, ёпиқлиқ қозон яна ёпиқлигича қолади, ҳеч нима ўзгармайди. Йўқ. Асло бундай эмас. Истеъмолчилар ва жамоатчилик эътирозларини айтди. Ишлаб чиқарувчи ва бенефициарлар ўз позицияларини очиқлашди. Ҳатто конструктив ўрталиқ ҳам топилгандек. Яъни, ҳаммаси мана энди бошланмоқда. Буёғига асосий савол ва сўров қарор қабул қилувчиларга. Биринчидан, маиший техника ишлаб чиқарувчилар ҳам, уларнинг камида иккита ўзаро боғлиқ гуруҳини бирлаштирувчи энг йирик бенефициар ҳам аждарҳо божларга ва протекционизмга қарши. Ишлаб чиқарувчиларнинг ўзи юқори божлар уларга зиён келтираётганини қайта ва қайта таъкидлашди. Истеъмолчиларга келтираётган зиёнларни яна бир бор такрорлаш шарт эмас. Демак, маиший техника импортида божлар ноллаштирилиши керак! Иккинчидан, ишлаб чиқарувчиларнинг ўзлари экспорт бозорлари улар учун приоритет эканини айтишмоқда. Яқин бозорлар сарҳадларидан ўтиб, ҳатто АҚШ, Швеция бозорларига кириб борилаётгани айтилди. Айтилган сўзларнинг самимиятига ишонсак,  импортни чеклаб, унинг ўрнини маҳалллийлаштириш билан босишдан улар умуман манфаатдор эмас. Демак, киши бошига чекловлар, давлат харидларидаги преференциялар каби нотариф тўсиқлар олиб ташланиши зарур. Давлат ишлаб чиқарувчиларга қандай рағбат кўрсатмоқчи бўлса, бундан буён фақат экспорт учун, айниқса соф экспортчилар учун бериши лозим. Учинчидан, энг йирик маиший техника ишлаб чиқарувчининг бенефициари ва ўша вақтда ҳоким вазифасида ишлаган Артикходжаевнинг ўзи Технопарк қандай ташкил этилгани, ғоя муаллифи ким бўлгани, бошқарув компанияси устида ким турганини очиқ-ойдин айтиб турипти. Шундай экан, Технопарк МЧЖ ишончли бошқаруви қачон, қанча муддатга ва қандай шартларда топширилганини, ишончли бошқарувнинг молиявий ва иқтисодий натижаларини эълон қилишга нима тўсиқ бўлиши мумкин? Ёки Ҳукумат, унинг вакили Давактив айтсин, Технопарк МЧЖнинг ишончли бошқарувга бериш бўйича битимнинг фалон қисми давлат сири, ҳарбий сир, шунинг учун махфий ва ёпиқ деб. Тўртинчидан, Жаҳонгир Артикходжаевнинг ўзи Пахтакор клуби ва стадионини фақат текинга беришса, оламан, 100 долларам тўламайман, деб баёнот бермоқда. Албатта, режали ниятларини очиқлаган Артикходжаевга раҳмат айтган ҳолда, Пахтакорни стадиони билан («Пахтакор футбол клуби» МЧЖнинг 100 фоиз давлат улушини) сотувга чиқаришдан қандай иқтисодий маъно, деган саволга энди Давактив жавоб бериши керак бўлади. Агар қизиқиш билдирган ва асосий деб кўрилган харидор шундай деб турса, оммавий савдо жараёни қандай кечади? Буни савдо деб атаб бўладими ўзи? Пойтахт марказидаги Шарқ биноси ва 3 гектар жойда жойлашган цехлар бўйича эълон қилинган савдонинг Пахтакорнинг сотилиши бўйича савдодан қандай фарқи бўлади?