Ҳавони пулли қилаётган зараркунанда божлар бекор бўладими? Кичик бўлсаям умид борки, янги суперқўмита ёмонлашаётган экология, хусусан ифлосланган ҳаводан азоб чекаётган ўзбекистонликларни икки карра талаш учун қўйилган божларни ҳам танқидий кўриб чиқади. Ҳаво тозалагичлар учун 20%лик аждарҳо божлар ҳамиша ҳам мавжуд бўлмаган. 2018 йил 28 декабрдан ҳаво тозалагичлар учун 20%лик, кондиционерлар учун 30% (камида 50 долларлик) аждарҳо божлар киритилган (бу санадан бир ҳафта аввал божлардан манфаатдор корчалонлар учун муҳим тайинлов бўлган). Унгача ҳаво тозалагичга ҳам, кондиционерга ҳам бож бўлмаган. Айнан 2018 йилдан кейин нафақат божлар кескин оширилди, пойтахт ва йирик шаҳарларда дарахтларнинг аёвсиз кесилиши ва экологиянинг маъмурий қарорлар таъсири остида ёмонлашуви оқибати ўлароқ кондиционерга, охирги йилларда эса ҳаво тозалагичга талаб кескин ошди. Шундай экан, янгиланган экоқўмитанинг қийин вазифалари рўйхатида аждарҳо божларни бекор қилиш, импорт божлардан манфаатдор бенефициарларга, яъни йирик бизнесларга ёқимсиз қарорларга бориш эҳтимоли ҳам туради. Экология яхшиланиши учун энергетикларга рўпара бўлишга тўғри келиши ҳақидаку, айтмасак ҳам, энди ҳамма билади.