Энергосамарадорлик йўлида кўмир учун божлар бекор қилиниши керакми ёки кондиционерлар учун? Ўзбекистонда қандай олигархлар кўмир импортини назорат қилади, мазут импортчилари қайси корчалонлар, деган савол қўйилса, расмий жавоб барибир берилмайди. Лекин нима учун шонли энергетиклар ўзи мураккаб экологик вазиятни янада оғирлаштирадиган, экологияга қўшиб инсонлар саломатлигини ёмонлаштирадиган кўмир ва мазутга божлар бекор қилишни дастаклаётганини тушуниш учун шу риторик саволнинг ўзи кифоя бўлади. Кўмир ва мазутга божларнинг бекор қилиниши халққа ва мамлакатга зиён бўлиши мумкин, лекин олигарх ва корчалонларга фойда. Энерготежамкорликка ўтиш мақсадларида кондиционер ва умуман маиший техникага божларнинг бекор қилиниши халққа ва мамлакатга фойда, лекин протекционистик божлардан нафсланиб ўсаётган аждарҳо олигархларга зиён. Шундай экан, шонли энергетиклар кондиционер ва маиший техника учун эмас, кўмир ва мазутга божларни бекор қилишни сўрашаётганидан ажабланмаслик керак. Бу ҳам қора туйнук моделининг бир қисми, ажралмас қисми. P.S. Агар ёпиқ қарорлар билан ўзгартириш киритилмаган бўлса ёки кўмир ва мазут импорт қилувчи "бегоналар"га алоҳида божлар киритилмаган бўлса, кўмир ва мазут учун божлар ўзи "ноллаштирилган".