Самарасиз энергетикани квази молиялаштириш давом этади Тарифлар кескин ошгандан кейин ўзбек истеъмолчилари, минг афсуски, қимматлашган тарифлардан бўлак ҳеч нарса олишгани йўқ. Таъминот барқарорлигидаги муаммолар ўша-ўша, авария ва таъмирлаш баҳона юз бераётган энергодискотека режими фақат кучаймоқда. Таннархнинг шаклланиши, энергетикадаги занжирларда битимлар ва харидлар қиймати ёпиқлигича қолмоқда. Бюджет мувозанатини издан чиқарган субсидиялаш тўхтатилмади, қачон тўхтатилишиям номаълум, самарасиз энергетиканинг бюджетга юкламаси ортишда давом этмоқда. Ўзбекистон иқтисодиётини ботқоққа ботираётган, сиёсий қарамликка етаклаётган, иқтисодий маънога эга бўлмаган, қиймати каррасига шиширилган лойиҳаларни дастаклашга барҳам берилгани йўқ. Қўшимчасига машъум оқибатлари келажак авлод зиммасига юкланадиган АЭС қурилиши маъқулланиб, қиймати ва шартлари ҳеч бир апелляциясиз ёпиқлиги эълон қилинди. Шу контекстда, олигархия назоратидаги кўмир учун навбатдаги имтиёзлар, энергетикага қўшимча ажратиладиган навбатдаги 14 трлн.сўмлик транш, у бевосита бюджет молиялаштириши бўладими ё квази фискал характерга эга бўладими, фарқи йўқ, битта ягона ишора беради: Энергетика тизими алмаштирилмас шонли энергетиклар қўлида қора туйнукка айланиб бўлган. У қора туйнукдир...