Боғдорчилик ривожини илм ва технологиялар белгилайди Тобора мураккаблашиб бораётган иқлим ўзгаришлари шароитида таваккалчилик ва эски анъаналарга эмас, илмга ва технологияларга таяниш кераклигини замоннинг ўзи талаб қилмоқда. Энди баҳорги музлама ва совуқ уришлар, гоҳ исиб, гоҳ кескин совуб кетадиган аномал қиш омилларини доимий деб ҳисобга олишга тўғри келади. Шундай реалликларда ўтган ҳафтада ишга туширилган Agro InVitro лойиҳаси Ўзбекистон боғдорчилиги учун янги босқичдаги намунага айланиши керак. Агробанк томонидан молиялаштирилган, қиймати 15 млн.долларлик мазкур лойиҳа Нидерландия тажрибасига таянилган замонавий лаборатория ва иссиқхонани ўз ичига олган. Жараён занжирида кўчатчиликнинг тўлиқ цикли қамраб олинади, йилига 10 млн донадан ортиқ кўчат етиштирилади. Импорт қилинган мевали ва манзарали кўчатлар энди тўлиқ маҳаллий муҳитда ўстирилади, яқин келажакда экспорт қилиш имкониятлари ҳам очилади. Яъни лойиҳа мазмун-мундарижаси иқтисодий самарадорлик негизига эга.