Озарбайжон ва Арманистон чегараларидаги можаро ортидан тартибсизликлар давом этаяпти. Бугунга ўтар кечаси Москвада озарбайжон ва арманлар ўртасида оммавий муштлашиш рўй берган. Бу сафарги муштлашув полиция аралашуви билан тўхтатилибди. Аввалроқ майдроқ урушларга полиция аралашмаётган эди. Чунки Россия полициясига этник тўқнашувлар қизиқ эмас. Ҳаммаси Арманистон шимолидаги Озарбайжон билан чегарада (бу ҳудудда мамлакатдаги энг катта газ қовури ўтган) бўлган тўқнашувдан бошланган. Ҳар икки тараф бир-бирини айблаётгани учун ҳозир ким ҳақ, ноҳақлигини айтиб бўлмайди. Лекин вафот этганларнинг сони нечта бўлишига қарамай, икки давлатнинг муаммосини учинчи давлатга кўчириш нотўғри. Айниқса этник конфликт бўлса. Дастлаб, озарбайжонлик бизнесменларга қарашли Фуд-Сити савдо марказига Арманистондан келитирилган мева ва сабзовот фуралари киритилмади. Арман блогерлари ва черковининг ҳаракатлари билан мевалар шаҳарда оддий одамларга тарқатилди, улгуржи нархларда сотилди. Оммага муаммо олиб чиқилгач, Москва шаҳрининг ўзида икки этнос вакиллари ўртасида муштлашувлар кундан-кун кучайиб кетаяпти. Арманлар озарбайжонча гапирганларни уриб кетаяпти куппа-кундузи кўчада. Озарбайжонлар арманлар яшайдиган жойларга оммавий борволиб, уруш қилаяпти. Хуллас, тартибсизликларга ҳуқуқ тартибот органлари аралашиб, вазиятни назоратга олиши керак. Этник тўқнашувларнинг фарқли жиҳати уларнинг асл сабаби бир неча юз йиллик ўтмишдан бошланади. Қадриятлар, дин, миллий ғоя, қониқтирилмаган оммавий эҳтиёжлардан бошланган норозилик этногенга сингдирилиб кетилганидан неча йил ўтса ҳам тўқнашув учун кўп сабаб керак бўлмайди. Шунинг учун этник конфликтларнинг ҳар қандай кўринишига бефарқ қараб бўлмайди. Эътиборсиз қолдирилган ҳар қандай шовинистик ва нацистлик кайфияти эртага ҳатто учинчи давлатларда ҳам янги муаммоларни яратишига сабаб бўлиши мумкин. Бу муаммо шунчалик чуқур-ки, қонуний чора кўрилса ҳам, кўрилмаса ҳам ўзаро адоватнинг кучайишига олиб келаверади. Шунинг учун, ҳуқуқ-тартибот тизими хушёр бўлиши керак. Буларнинг ёзишимдан мақсад нима? Мандаги маълумотларга кўра Фуд-Ситида ва яна бошқа икки миллат вакилларига қарашли объектларда ишлайдиган бошқа мигрантлар - ўзбеклар, тожиклар ва ҳ.к. ҳам "дўстлари учун" конфликтларга аралашиб қолаяптикан. Аралашманглар. Умуман. Муштлашувни тўхтата олсангиз, тўхтатинг. Олдини ололсангиз, олинг. Лекин ҳеч кимнинг тарафини олиб, муштлашиб юрманг. Биринчидан, бу ноқонуний. Миллатларо тўқнашувни ёқламанг. Иккинчидан, чет эл фуқароси бўлганингиз учун, Россия қонунчилигига кўра депорт қилинасиз. Депорт бўлишни хоҳламасангиз керак. @zarnigor1