Суверенитетга таҳдидлар ва бож дағдағалари олтин-у кумушни осмонга кўтармоқда Даниянинг ажралмас қисми бўлган Гренландияни қўшиб олишга Трамп даъволари ўтган ҳафта Европанинг 8 мамлакатига қўшимча 10%лик божлар киритиш дағдағаси билан давом этди. Божлар 1 июндан 25%гача оширилиши мумкин, агар Гренландияни эгаллаб олиш мақсадлари амалга ошмаса. Трамп қора рўйхатига тушган мамлакатлар Гренландия ҳимояси учун оролга аскар жўнатишган ёки Даниянинг Гренландия устидан суверенитетини фаол қўллашган эди. Кеча Европа иттифоқи жавоб тариқасида 93 млрд.евролик АҚШ товарларига нисбатан бож киритишни муҳокама қилаётгани маълум бўлди. Мазкур восита ҳар эҳтимолга қарши ёки компромиссга эришиш учун восита ўлароқ кўрилмоқда. Бу орада Трамп Тинчлик кенгаши тузиш режаларини янада ойдинлаштирди. Янги БМТга менгзалаётган Тинчлик кенгашига доимий аъзолик учун 1 млрд.доллардан сўралаётгани айтилмоқда. Охирги 80 йилда кўз кўриб қулоқ эшитмаган, энг ёмон прогнозларда ҳам кутилмаган ҳодисалар ортидан олтин котировкалари 4 680 доллардан, кумуш котировкалари 94 доллардан ошган.