Вақтинчалик чекловда чеклов бошланиши ва тугаши аниқ бўлади Энергетика вазирлиги метан заправкалар бўйича кеча ярим тунда тан олган “вақтинчалик чеклов” ўз номи билан аталиши керак. Бу метан заправкалар фаолиятининг тўхтатилиши. Вақтинчалик чекловда чеклов бошланиши ва тугаши соатлари аниқ кўрсатилади ёки ҳеч қурса, чеклов қайси куни бошланиб, қайси куни тугаши айтилади. Кеча ва бугун Ўзбекистон бўйлаб минглаб заправкалар очилгани йўқ (водийда 8 январдан буён шу аҳвол). Олдинда номаълумлик. Вазирлик вақтинчалик чекловлар жорий қилингани ҳақида 20 январь 00:31да хабар эълон қилган, лекин яна шу вазирлик 20 январь 18:24да берган ахборотга кўра, 19 январь куни заправкаларга 1,3 млн.куб метан берилган (100тача заправканинг иш ҳажми). Маълумот учун, қиш кунлари Ўзбекистондаги 1500дан ортиқ метан заправкаларга 15-18 млн.куб газ керак бўлади. Яъни, метан заправкаларнинг 90%идан зиёди ҳали "чекловлар киритилгани" ҳақида хабар эълон қилинмасидан олдин фаолият кўрсатмаган. Аввалги йиллардаги кризислар пайтида брифингларда ҳеч қурса нечта заправкага газ берилгани айтиларди, ҳозир шугина ахборот ҳам йўқ (йилдан йилга йил бадтар).