Mobiuz' савдоси бўйича танланган ғолиб қачон эълон қилинади? Mobiuz алоқа операторини хусусийлаштириш бўйича бир ой аввал эълон қилинган Давактивнинг охирги баёнотига кўра, 6 та талабгордан мажбуриятга эга таклифларни қабул қилиб олиниб, улар орасидан 3 таси энг жозибали деб топилгани ва уларга ўз таклифини яхшилаш учун 23 январгача муддат берилгани айтилганди. Яъни, учовлон талабгорлардан янада яхши таклифлар аллақачон олиниб, солиштирилиб, ғолибни танлаб, эълон қилиш учун етарлича муддат ўтди. Лекин ҳануз жимлик. Агар ўйин қоидаларига яна қандайдир ўзгартиришлар киритилиб қолинган бўлса, бу ҳақда жамоатчилик билишга ҳақли. Ўзбекистоннинг 1991 йилдан бери энг қўлма-қўл бўлган ва тарихий суриштирувларга кирган репутациясига эга уяли алоқа компаниясини хусусийлаштириш учун стратегик ва молиявий консультант сифатида – “Rothschild & Co”; молиявий консультант сифатида, шунингдек молиявий, солиқ ва юридик экспертиза (vendor due diligence) учун – “KPMG”; мустақил баҳоловчи сифатида – “Deloitte” компаниялари жалб қилинган.