Депутат ва сенаторлар Рим Папаси ё БМТ котиби эмаску Албатта, депутат Бобур Бекмурадовнинг тадбиркорларни ҳимоя қилиш бўйича кеч бўлсаям янграётган чақириқларидан хурсанд бўлишимиз керак. Ҳарна. Лекин охирги кунларда янграётган чақириқ ва хавотирлардан дўкони бузилган, бузилаётган, станцияси тармоқдан узилаётган ё узилган, пешлавҳалари синдирилган ёки синдирилаётган тадбиркорга нима наф? Тадбиркорларга қарши антиконституцион зўравонлик ўтган ҳафта, кеча юз берган, бугун давом этмоқда. Бу кетишда эртагаям ва индингаям тўхтамайди. Сизлар, барака топгурлар, Рим Папаси ё БМТ котиби эмассизларку “тинимсиз хавотир” билдириб ўтирадиган. Мандатингиз бор тўхтатишга. Ишлатинг зўравонларга қарши шу халқ берган мандатни. Яккасаройга, Чилонзорга, Олмазорга боринг. Бормасангизам майли, чақиринг зўравонларни Парламентга. Эсда тутингки, қабул қилинганига ҳали 3 йил бўлмаган Конституция бугун мулк ҳуқуқи бузилаётган тадбиркорларни ҳимоя қила олмаётган бўлса, эртага сизниям ҳимоя қилолмайди. Агар Конституция ишлатилмаса.