Депутат 128- модда талабларини талқин этаяпти Депутат Шуҳрат Полвоновга кўра, Конституцияга ўзгартириш кириш тартиби белгиланган 128- моддада кўрсатилган олти ойлик муддат лойиҳани муҳокама этишга эмас, уни қабул қилиш учун бериляпти экан. Унинг айтишича, қонунни қабул қилиш муддати олти ойдан ошмаслиги шарт. Бу эса, палаталар етарлича муҳокамани ташкил этиб, лойиҳани маромига етказган бўлса, истаса, уни бир ё икки ойда ҳам қабул қилиши мумкинлигини билдиради. Депутатнинг мулоҳазаларига айрим фикрларни билдириб ўтсак. Биринчидан, 128- моддада" кенг ва ҳар тарафлама муҳокама" ибораси ишлатилган. Негадир жаноб депутат ўзининг позициясини дастаклаб учун ноқулай бўлган айни шу жойини ташлаб кетаяпти. Конституцияга ўзгартиришлар киритиш 11 декабрда Сенат кун тартибига киритилганида асосий эътирозимиз ҳам шу эди: Нега лойиҳа кенг ва ҳар тарафлама муҳокама бўлмай, ҳатто ўзгартиришлар матни эълон ҳам қилинмай туриб тасдиқлаш учун Кун тартибига киритилди. Иккинчидан, жаноб депутат 128- моддадаги "олти ой мобайнида" иборасини яна ўзига қулай тарзда, яъни "олти ойгача" кўринишида талқин этмоқда Учинчидан, Конституцияга ўзгартириш бўйича жамиятдаги мунозаралар, аввал Сенат раисининг ўзини оқлашга уриниши, кейин мана бу депутатнинг чиқиши каби ҳолатлар Конституциявий суд ўзининг функциясини бажармаётгани учун ҳам юз бермоқда. Конституциянинг мундарижаси, шакли, маъноси бўйича талқин фақат Конституцион суд томонидан амалга оширилиши мумкин. Лекин ҳатто Малавида мавжуд бўлган Конституцион суд бизда борми? Тўртинчидан, ўтган 30 йилда тепадагиларнинг Конституцияга нималардир ёзилган қанақадир қоғоз сифатида муносабатда бўлиб келингани, унинг қадриятлари ўз ўрнини топмагани, кези келганда амал қилинмагани, сиёсий конъюнктурадан келиб чиқиб ошкора ва яширинча ўзгартиришлар киритилгани қонун билан яшашни орзу қилиб келаётган ўзбек жамиятида, унинг аъзоси бўлган менда ҳам Конституция билан боғлиқ янги манипуляциялар юз бериши борасида хавотирларни йўққа чиқаргани йўқ. Шунингчун, майлими, сўрасак, қаранглар, Конституцияга, қонунларга амал қилинглар, сирли, махфий жараёнлар бошланиб кетмасин деб турсак? @the_bakiroo