Ҳаммага машҳур ТТЗ, яъни “Тошкент трактор заводи” ҳозир “AgroTech Klaster” номига ўзгартирилган. Бунинг ҳам ўзига яраша сабаби бор. Завод Чирчиққа кўчирилиб, унинг таркибига 5 та йирик корхона — “Тошкент қишлоқ хўжалиги машинасозлиги заводи”, “Агрегат заводи”, “Технолог”, “Технолог-стан” ва “Агросаноатмашинвест” бирлаштирилган. Ҳозир бу заводда 35 турдан ортиқ агротехника — комбайн ва трактордан тортиб, қишлоқ хўжалиги учун зарур бўлган барча техникалар ишлаб чиқарилмоқда. Муҳим томонига ўтсак, aгар сиз шу ерда ишлаб чиқарилган техникани тўғридан-тўғри заводдан харид қилсангиз, давлат унинг қийматининг 15 фоизини субсидия қилиб беради. Бунга ҚҚС қайтарилишини ҳам қўшсак, амалда техника нархининг қарийб 27 фоизи харидорга қайтиб келади. Томчилатиб суғориш учун мўлжалланган лазерли ер текислагичларда эса давлат субсидияси 30 фоизни ташкил қилади. Маблағ етмаса ҳам ечим бор. Агробанкнинг Agrozamin.uz платформаси орқали техникани имтиёзли шартларда харид қилиш мумкин.