АҚШдаги ўзбек болалари: «Чемпион» фильмининг Филадельфиядаги премьераси ва миллий контент дефицити ҳақида Иқтисодда фақат пул ёки товарлар айланмайди, унда энг қиммат актив — инсон капитали ва унинг трансформацияси ҳам бор. Бугун АҚШда минглаб ўзбек оилалари яшамоқда. Улар Ватанга миллионлаб доллар пул ўтказмалари жўнатаётган бўлиши мумкин. Лекин у ерда катта бўлаётган, инглиз тили ва бегона маданият глобаллашуви ичида нафас олаётган иккинчи авлод — ўзбек болаларичи? Уларнинг миллий ўзлигини, она тили ва маданиятини сақлаб қолишнинг иқтисодий ва ижтимоий қиймати қанча? Агар бугун мусофирликдаги фарзандларимизга ўз тилимизда сифатли контент бермасак, эртага нафақат тилдан, балки ўша катта интеллектуал ва маданий капиталдан бутунлай айриламиз. Уларга узоқдан туриб, "ўзбекчани эсингдан чиқарма!" дейиш ярамайди, болаларга соқ ўзбекча, рақобатбардош, замонавий ва қизиқарли контентлар керак. Шу нуқтаи назардан, Филадельфияда Болалар контентини ривожлантириш маркази буюртмасига асосан, Спорт вазирлиги ҳамкорлигида тасвирга олинган «Чемпион» бадиий фильмининг премьераси ўтказилгани жуда муҳим ва тўғри инвестициядир. Жаҳон чемпионатининг қизғин кунларида ташкил этилган ушбу намойиш океан ортида вояга етаётган ўзбек болаларини она тили ва миллий руҳ атрофида бирлаштира олади. Шу маънода Болалар контентини ривожлантириш маркази ташаббуси жуда керак. Дунё бозорлари ва масофалар қанчалик олис бўлмасин, тил ва миллий руҳ яшаса, Ватан ҳисси доимо яқин бўлиб қолаверади. Инсон капиталига тикилган инвестиция эса ҳеч қачон инқирозга учрамайди.