Нархлар сапчигани туфайли ёқилғи сотувидан тушумлар сезиларли ошган Июнь ойида автомобилларга ёқилғи қуйиш шохобчаларида жами 3 579 млрд.сўмлик тушум қайд этилган. Бу кунига ўртача 119,3 млрд.сўм дегани. Май ойига нисбатан солиштирганда кунлик сотувлар ҳажми 11,2%га ошган (солиштириш учун, май ойида жами 3 326,3 млрд.сўмлик ёки кунлик 107,3 млрд.сўмлик ёқилғи сотувлари қайд этилганди). Июнь ойида ёқилғи сотувлари ҳажмининг ошгани ягона омили — бу нархларнинг кескин ошгани билан боғлиқ. 1 июндан метан нархи 10%га сакраган бўлса, кузатувларга кўра, бензин чакана нархи 12-15%га, пропан нархи эса ойнинг бошидаёқ 20%гача сакраганди (статқўм қанча кўрсатади, 5 июнда билиб оламиз). Яна бир қизиқ ҳолат. Июнь ойида ёқилғи сотиб олиш билан боғлиқ транзакциялар сони кескин қисқарган ва 19,9 млн.гача тушган. Апрель ойида (1-22, 23-30) бу кўрсаткич 27,3 млн.ни ташкил этганди (май ойида транзакциялар сони эълон қилинмаган). Бу ҳайдовчилар (истеъмолчилар) АЁҚШларга камроқ боришмоқда, лекин кўпроқ ёқилғи қуйишмоқда дегани. Апрелда ҳар заправкага борилганда ўртача 122,2 минг сўм тўланган бўлса, июнда бу кўрсаткич 180 минг сўмгача кўтарилган (албатта, нархлар ошгани омили ҳам бор).