​Ошди-ошди мавсуми: пропан яна кескин қимматлаган Пойтахт Тошкент ва ёндош туманларда охирги кунларда пропан нархи литрига 6 000-6 200 сўмдан 6 700-6 900 сўмгача қимматлаб кетган. Кунўз водийдаги шохобчаларда пропан нархи литрига 7 000 сўмгача кўтарилгани ҳақида ёзмоқда. Расмийлар пропан нархи бирданига 10-12%га қимматлагани сабабларини изоҳлашгани йўқ. Пропаннинг Ўзбекистонда куз ва қиш мавсумида сунъий дефицит воситасида қимматлашишиши (таъмирлаш ва бошқа баҳона-ю важлар билан) доимий кузатиладиган ҳодиса бўлиб қолган, лекин ёзга яқин ёқилғи нархининг осмонга сакрашидаги энергоаномаллик нимада? (агар худди қишдагидек импортчиларнинг яна тил бириктириши рўй бермаётган бўлса). Эҳтимолки, аномал сакраш Ўзбекистонда газ қазиб олишнинг рекорд даражада кескин қисқариши билан ҳам боғлиқ бўлиши мумкин (бу ҳолатга ҳам изоҳ берилмади). Газ жисмонан бўлмаса, пропан қандай ишлаб чиқарилади? Статқўм суюлтирилган газ — пропан/бутан ишлаб чиқариш бўйича статистикани умуман очиқламайди. Апрель ойи божхона маълумотларига кўра, суюқ ёқилғи импорти 2,9 карра ошгани кўринган эди. Биржада ҳам пропан нархи ошишда давом этмоқда (тоннасига 7,7 млн.сўмдан ошган). Кунлик сотувлар 2 300 тоннадан 1 850 тоннагача тушиб қолган. Маълумот учун, ўтган 2025 йил апрель-май ойида метан нархлари ошиши олдидан ҳам пропан нархлари ошириб олинган эди. Хуллас саволлар жуда кўп. Импортчилар тил бириктурувими? Газ қазиб олиш қисқариши ортидан ишлаб чиқаришнинг қулашими? Энерготарифлар, хусусан метан ошиши олдидан пропан нархини ҳам ошириб олишга тайёргарликми? Ё ҳаммаси бирдами?