Иссиқлик тарифлари учун ижтимоий норма таклифи: нормадан ортиғи бирданига 5 карра ошадими ёки 4 йилда 5 карра ошадими? Яширин иқтисодиёт улушини қисқартириш, солиқ ва божхона маъмурчилигини такомиллаштириш ҳамда фискал таҳлиллар институти барча истеъмолчилар учун иссиқлик таъминоти тарифларини компенсация қилишдан эҳтиёжманд уй хўжаликларини ижтимоий манзилли қўллаб-қувватлашга ўтишни таклиф этмоқда. Spot нашри институт ташаббуслари ҳақида батафсил тўхталган. Амалдаги модель ўрнига босқичма-босқич ижтимоий нормани жорий этиш, базавий норма сифатида уй хўжалигига 60 кв.м ёки ҳар бир рўйхатдан ўтган яшовчига 16 кв.метр ҳисобидан юқорироқ меъёр белгилаш таклиф этилмоқда. Белгиланган ижтимоий нормадан ортиқ майдон учун базавий тариф бўйича, яъни амалдаги тарифдан беш баравар кўп ҳақ тўлаш илгари сурилган. Шунингдек, институт иккинчи ва ундан кейинги уй-жойни босқичма-босқич базавий тарифга ўтказишни — 40% дан 100% гача, юридик шахслар учун эса базавий тариф бўйича тўлов улушини 60% дан 80% гача, ундан кейин 100% гача оширишни таклиф қилган. Ўрта муддатли истиқболда Ижтимоий ҳимоя ягона реестри орқали эҳтиёжмандларга манзилли пул ёрдами кўрсатиш режа қилинган Тақдимотда, шунингдек, аҳолининг катта қисми учун амалдаги шартлар сақланиб қолиши қайд этилган: Ёзилишича, Тошкентда майдони 60 кв.метргача бўлган 45,4% хонадон учун тўлов тартиби ўзгармайди. Ўзбекистонда 2030 йилгача иситиш ва иссиқ сув учун субсидиялардан бутунлай воз кечиши режалари мавжудлиги ҳисобга олинса, амалдаги тарифларни ҳар йили 50% атрофида ошириб бориш керак бўлади ёки бирданига 5 карра (ўтган йилги ҳисоб бўйича ҳар йили 41%дан ошиши керак эди). Иссиқлик учун 2026 йил бюджетидан 3,8 трлн.сўм субсидия ажратилган, шунинг 2,9 трлн.сўми Тошкент шаҳри учун тўғри келади. Институт таклифларида иситиш билан боғлиқ таннарх қандай шаклланаётгани ва унинг шаффофлиги масаласига тўхталинмаган.