Учдан икки авиақатновлар Тошкент орқали, Қарши ва Навоий аэропортлари деградацияси давом этмоқда 2026 йилнинг биринчи ярим йиллигида Ўзбекистон аэропортлари орқали жами 8 153 470 нафар йўловчи ташилган. Бу ўтган йилнинг шу даврига нисбатан 15,5% кўп. Яхши янгиликлардан бири — ниҳоят маҳаллий қатновларда ташиш ўса бошлаган - ички рейсларда 1 455 112 нафар йўловчи ташилган (+15,1%). Лекин 39 миллионлик Ўзбекистон учун бу жуда кам. Ўсишнинг асосий омилини яна Тошкент аэропорти белгиламоқда. Жами йўловчи ташишда Тошкент аэропортининг улуши 66%га етган. Абсурд кўринар, лекин сурхондарёлик ё қорақалпоғистонлик Самарқандга бориши учун Тошкент орқали бориш ва келишга қўшимча 2 000 км йўл босиши керак. Вилоятлардаги қатор аэропортларнинг деградацияси давом этмоқда. Мингта имтиёз бериб, "мустақил" қилинган Навоий аэропортида энг катта пасайиш юз берган (-27%). Улкан салоҳията эга бўлган, лекин қамраб ўтирилган Қарши аэропортида йўловчи ташиш 22%га, тендерсиз ДХШга берилган ва июнь ойида янги терминали ишга тушиши ваъда қилинган Наманган аэропортида 11%лик пасайиш қайд этилган. Йилига 8 миллион йўловчига хизмат кўрсатиши мумкин бўлган Самарқанд аэропортида атига 759 232 йўловчи ташилган, қизиғи мазкур аэропортнинг ички рейслардаги улуши жуда паст. Энг яхши ўсишни Урганч аэропорти кўрсатмоқда - 479 527 йўловчи (+24%) Андижондаги ўсиш ўтган йилнинг паст базаси туфайли шаклланган. Ҳисоботга юзлаб миллиард сўм сарфланиб таъмирланган Қўқон, Зомин, Шаҳрисабз, Мўйноқ, Сариосиё ва Сўх аэропортлари бўйича маълумотлар киритилмаган.