Қия очиқ осмон: Ўзбекистон аэропортларида йўловчи ташиш ўсиши секинлашган 2025 йилда Ўзбекистон аэропортлари орқали йўловчи ташиш 14%га ўсиб, жами 15,5 млн.нафарга етган. Солиштириш учун, 2024 йилда йўловчи ташиш ўсиши 33%ни ташкил этганди. Секинлашган ўсишнинг катта қисми ва асосий улуши халқаро рейсларга тўғри келган. Йил давомида халқаро рейсларда 12,7 млн.йўловчи ташилган (+15,3%), бу жами йўловчи ташишнинг 82%ини ташкил этади. Монополист ва олигархия тарафидан авиаёқилғи сунъий қимматлаштирилгани туфайли ички қатновлар ҳалиям иккинчи даражали бўлиб қолмоқда. Йил давомида ички рейсларда 2,8 млн.йўловчи ташилган (+12,8%). Uzbekistan Airports 2024 йилдагидан фарқли ўлароқ, аэропортлар қирқимида, шунингдек, резидент-норезидент авиакомпаниялар қирқимида маълумотлар эълон қилмаган. Бу катта эҳтимол, 2025 йилда концентрация яна Тошкент ва Самарқанд аэропорти, шунингдек маҳаллий-монополист авиакомпанияларимиз улуши ошганини кўрсатмаслик билан боғлиқ бўлиши мумкин. Осмонимиз очилиш ўрнига яна қиялашаётганини жалб қилинган авиакомпаниялар сони кескин камайганидан ҳам кўрса бўлади. 2024 йилда 9та хорижий авиакомпания Ўзбекистон бозорига кирган бўлса. 2025 йилда атига 4та компанияга рўйхушлик кўрсатилган (Ўзбекистондан чиқиб кетган авиакомпаниялар номи келтирилмаган, масалан, WizzAir, World2Fly, IberoJet кабилар).