Учмас ўзбеклар маҳаллий қатновларда янаям камроқ учишмоқда Тийиқсиз олигархия қимматлаштирилган авиаёқилғи орқали ўзбекистонликларни учмас қилаётгани ва талаётгани ҳақида жуда кўп ёзганмиз. 2025 йил биринчи ярим йиллиги бўйича ташув маҳаллий қатновларда 1 263 304 йўловчидан 1 252 724 йўловчигача қисқарган. Лекин бу маълумотни Uzbekistan Airports жорий ҳисоботидан топа олмайсиз (давлат компаниялари ахборотларнинг манфий, салбий, негатив қисмларини тушириб қолдириб ахборот манипуляциясини ясашга аллақачон ўтиб олишган). Маҳаллий қатновларда йўловчи ташиш камайгани картинасини кўриш учун ўтган йилнинг тегишли даври билан солиштиришга ва кичик ҳисоб-китобларни амалга оширишга тўғри келади. Демак, 2025 йилнинг биринчи ярим йиллигида Ўзбекистон аэропортлари орқали 7 059 084 нафар йўловчи ташилган. Ўтган йилнинг тегишли даврига нисбатан ўсиш фақат халқаро рейслар ҳисобига юз берган. Нима учун монополист ҳавошкадан тортиб "хусусий" компанияларгача ҳеч бўлмаса бир марта арзон авиаёқилғи қуйиб олиш учун халқаро қатновларни афзал кўриши ҳақида жуда кўп тўхталганмиз. Ички қатновларда йўловчи ташиш эса қисқарган, аниқ рақамларда айтсак, маҳаллий қатновларда ташиш 10 580 нафар йўловчига камайган. Яна бир эътиборли жиҳат, йўловчи ташиш фақат Тошкент аэропорти ҳисобига ўсган, вилоятлардаги аэропортларда ташув қисқарган (бу ҳақдаям Uzbekistan Airports ҳисоботида ўқимайсиз). Ўтган йилги маълумотларга чоғиштирсак, Тошкент аэропортида йўловчи ташиш ~3 887 502 нафардан 4 587 253 нафаргача ўсган, қолган аэропортларда эса ~2 481 881 нафардан 2 471 831 нафаргача қисқарган (Шартли Ўш аэропорти деградацияга маҳкум қилинган Андижон, Қўқон, Фарғона, Наманган аэропортларини қўшгандаям ортда қолдиришда давом этмоқда). Пойтахт аэропортининг йўловчи ташишдаги улуши 61%дан 65%га етган. Олигархия манфаати учун бутун бошли тармоқлар ва ўзбекистонликлар танлови қурбон қилиниши бўлса, шунчалик бўладида. Дарвоқе, ўтказиб юборган бўлсангиз, кеча кунўз студиясида шу ҳақда гаплашганмиз.