Ҳавошкамиз ўсиши учун вазндор рақобатчилар ва очиқ бозор керак Ўзбекистон аэропортлари орқали йўловчи ташиш ўсиши 2025 йилда секинлашгани ва бу кетишда қардош Қозоғистонга нисоб у ёқда турсин, сонда ҳам ета олмаслигимиз истиқболлари фонида миллий авиакомпаниямиз Uzbekistan Airways'да йўловчи ташиш ўсиши суръати пасайгани, юк ташиш эса кескин қисқаргани бозорнинг қия очиқлиги ёки ёпиқлиги монополистнинг ўзига ҳам зиён эканлиги ҳақидаги кўп такрорланадиган тезислар ҳақиқатига етаклайди. Шундай қилиб, жонажон ҳавошкамиз ўтган 2025 йилда йўловчи ташишни атига 6,5%га ошира олган ва 6,6 млнга етказган холос. Солиштириш учун, авиабозоримиз очиқроқ бўлган 2024 йилда йўловчи ташишда бозор 33%га, флагман ҳавошка эса 24%га ўсганди. Юк ташишдаги аҳвол эса биратўла орқага кетган (экспорт ва импортимиз потираб, иқтисодиётимиз эса юқори суръатда ўсаётган бир вазиятда бу нонсенс). 2025 йилда ҳавошка юк ташишни қарийб 22%га ёки 66,6 минг тоннадан 52,0 минг тоннагача қисқартирган. Солиштириш учун, 2024 йилда юк ташиш 2023 йилдаги 28,7 минг тоннадан 52,0 минг тонннагача ошганди. Ҳавошкада юк ташиш қисқаргани жараёнини кузатган ва зийрак-тийрак ўқувчиларнинг ёдига бир неча йиллар аввал Ўзбекнефтегаз ўз салоҳиятли конларини ва жозибали пудратларини "хусусий чўнтак контораларга" совға қилгани ҳолати эсига тушса ажаб эмас. Зеро ростанам Ўзбекистонда бошқа "хусусий чўнтак авиакомпаниялар" юк ташишни каррасига оширмоқдалар. Компания 2024 йилда 12та янги рейс очган бўлса, 2025 йилда атига 4та янги рейс очилган Дарвоқе, кечаги чиқишида Uzbekistan Airways раҳбарияти авиабилетлар нархи меъёрда ва рақобатбардош эканини таъкидлаб, маҳаллий ташувларда Centrum Air, Qanot Sharq ва Fly Khiva компаниялари номларини санаб ўтган. Бармоқ билан саноқли самолетларга эга ва асосан зиёратчилар ва туристларни чартер рейслар орқали ташийдиган мазкур компанияларнинг ички қатновлар сонидаги улуши ва йўловчилар ташишдаги вазни ҳақида компания раҳбари бирон бир маълумот келтирмаган. Хуллас, ҳавошкамиз фаол ўсиши ва қуйи инмаслиги учун спарринг ва чўнтак рақобатчилар билан эмас, ҳақиқий, унинг панжасига панжа урадиган вазнли рақобатчилар керак. Бунинг учун осмонимиз росмана очилиши ва авиапирог катталашишда давом этиши зарур. Шунда ҳаммамиз ютамиз.