Ўзбекистон осмонининг очилишидан ҳамма ютмоқда, ҳавошка ҳам Uzbekistan Airways йил бошидан бери 5 миллион йўловчи ташигани айтилмоқда. Шунчаки солиштириш учун, бу янги тарихимиздаги энг тўқ йил йил ҳисобланган 2019 йилдагидан 1,2 миллионга кўп. Дунёнинг кўплаб йирик авиакомпаниялари пандемиядан олдинги даражага ҳалиям чиқа олмаётганида ҳавошка қандай қилиб бунчалик тез ўсмоқда? Муваффақиятнинг асосий сири Ўзбекистон осмонининг очилаётганида. 2019 йилда Ўзбекистонда ҳаво транспорти орқали жами 6,4 миллион йўловчи ташилган, шундан 3,8 миллиони ҳавошка ҳиссасига тўғри келган. 2023 йил якунларига кўра, йўловчи ташиш 10 млн.дан ошади, шундан ярмидан камроғи Uzbekistan Airways ҳиссасига тўғри келади. Тарихимизда биринчи марта ҳавошка мутлақ устунликни бу йил бой беради. Лекин ҳавошка бундан ютқазаётгани йўқ, ютмоқда. Ўзбекистонликлар ҳам ютмоқда. Балки ўзимиз кўзимиз ва чўнтагимиз билан нафини кўраётган шу тажриба бошқа аждарҳо монополистлар учун ҳам ўрнак бўлар?