Ўзбек тўқимачилик корхоналарига глобал бозор эшикларини очувчи «виза» берилди Халқаро брендлар ва йирик харидорлар бозорига кириш учун фақат сифатли маҳсулотнинг ўзи камлик қилади. Тошкентда ўтган "BCI келажагини биргаликда шакллантирамиз" стратегик сессиясида мамлакатимизнинг 5 та йирик корхонаси — “Fergana Global Textile”, “Sultan Tex Group”, “Deniz Teks”, "Navbakhor Textile" ва “Zelal Tekstil” расман Better Cotton (BCI) сертификатини олди. Бу шунчаки қоғоз эмас, бу жаҳон бозорига чиқиш учун иқтисодий "виза". Сертификат маҳаллий текстил маҳсулотларимизнинг глобал таъминот занжирларига тўсиқларсиз киришини ва ташқи бозорда харидорлар ишончини таъминлайди. 2030 йилгача белгиланган ривожланиш стратегияси доирасида Енгил саноатни ривожлантириш агентлиги корхоналарни халқаро стандартларга тайёрлаш ва экспортдаги тўсиқларни камайтиришни давом эттиришини маълум қилган.