Ўзбекфильм бўйнига илинган 22,9 млн евро кредит мажбурияти нима мақсадда ишлатилган? Бюджет пуллари-чи? Бугун Ўзбекфильм киностудиясининг 22,9 млн евро кредит мажбурияти борлиги, мол-мулки ва ер майдонлари кредит учун гаровга қўйилган, солиқлардан қарийб 1 млрд сўмдан ортиқ қарздорлиги маълум қилинган Маданият вазирининг биринчи ўринбосари — Кинематография агентлиги директори Жаҳонгир Аҳмедов бошқа қўшимча тафсилотларни очиқламаган. 22,9 млн.евро кичик пул эмас. Бунча катта кредит қай мақсадларда берилган? Қайси банк томонидан? Қачон? Ўз ихтиёри биланми ё босим бўлганми? Кредит мақсадли ишлатилганми ўзи ё ўнгга-чапга совурилганми? Нима ҳисобидан, қайси тушумдан қайтаришмоқчи бўлган? Бу саволларга жавоб олиш Ўзбекфильмни асрашдан камроқ муҳим эмас. Кинога охирги йилларда бюджетдан ҳазилакам маблағлар ажратилаётгани йўқ. Масалан, 2023 йилда: кино маҳсулотларини яратишга 70 млрд.сўм; халқаро кинофестивалини ўтказиш учун 10 млрд.сўм; миллий сериаллар ишлаб чиқаришга 9,5 млрд.сўм; хорижий кинокомпаниялар томонидан Ўзбекистон ҳудудида кино ишлаб чиқариш учун 5 млрд.сўм; 2024 йилда: кино маҳсулотларини яратишга 105 млрд.сўм; халқаро кинофестивалини ўтказиш учун 10 млрд.сўм; миллий сериаллар ишлаб чиқаришга 12 млрд.сўм; хорижий кинокомпаниялар томонидан Ўзбекистон ҳудудида кино ишлаб чиқариш учун 5 млрд.сўм; 2025 йилда: кино маҳсулотларини яратишга 110 млрд.сўм; Тирик тарих фильмларига 70 млрд.сўм; халқаро кинофестивалини ўтказиш учун 10 млрд.сўм; миллий сериаллар ишлаб чиқаришга 12 млрд.сўм. Бу бюджет пуллари нимага ва қандай ишлатилган? Кино агентлигининг аввалги раҳбарлари ҳисоб ва жавоб берадими?