"Давлат ... ҳамма учун бир хил қоидаларни таъминлаши лозим" Рақобат қўмитаси раиси Ҳалилилло Турахужаев мустақил давлатчилигимизнинг 35 йиллиги арафасида соҳага оид амалга оширилган ишларнинг сарҳисобини қилган. Мақолада 2017 йилдан бошланган ўзгаришлар рақобат сиёсатини алоҳида кампаниядан давлат иқтисодий сиёсатининг доимий институтига айлантирилгани таъкидланган. Ҳа, биз истеъмолчилар антимонополия органимиздан ҳар доим дадил ўзгаришлар ва амалий ҳаракатлар кутамиз. Рақобат қўмитаси мустақил, монополист ва олигархлардан қудратли ва айни пайтда адолатли бўлиши керак — буни такрорлашдан чарчамаймиз. Айни пайтда ўтган даврда қилинган ишлар залвори ва кўлами ҳам кичик эмас. Ёзилишича, 4000 дан ортиқ норматив-ҳуқуқий ҳужжат лойиҳаси ўрганилиб, уларнинг 52 фоизида рақобатни чеклаши мумкин бўлган нормалар аниқланган. Давлат органлари ва маҳаллий ҳокимликларнинг рақобатга зид 6700 та қарори бекор қилинди ёки қонунчиликка мувофиқлаштирилган. Давлат хусусий бизнес билан маъмурий устунликларга таяниб рақобатлашмаслиги, балки ҳамма учун бир хил қоидаларни таъминлаши лозим. Шу мақсадда “Сариқ саҳифалар тамойили” (Yellow Pages Rule) жорий этилган: муайян бозорда камида бешта хусусий тадбиркор фаолият юритса, у ерда янги давлат корхонасини ташкил этиш чекланган (афсуски, бу қоидаларни четлаб, айланиб ўтаётганлар ҳам йўқ эмас). Бозорга киришни чеклаган эксклюзив ҳуқуқлар ва индивидуал имтиёзларни қайта кўриб чиқиш рақобат ислоҳотларининг амалий йўналишига айланган. Қайд этилишича, 24 та фаолият тури бўйича эксклюзив ҳуқуқлар бекор қилинган, 39 та соҳадаги индивидуал имтиёзлар қисқартирилган ёки қайта тартибга солинган. Нархларни либераллаштириш билан бир вақтда тил бириктириш, сунъий тақчиллик, устун мавқени суиистеъмол қилиш ва биржа манипуляцияларига қарши назорат кучайтирилган. Ижтимоий аҳамиятга эга товарлар бозорида эконометрик моделлар орқали нарх динамикасини олдиндан баҳолаш амалиёти ҳам йўлга қўйилган.