Ички инвесторларга ҳам, ташқи инвесторларга ҳам узоқ муддатли истиқболлар яққол кўриниши керак АҚШ Давлат департаменти яқинда навбатдаги йиллик Фискал шаффофлик ҳисоботини (Fiscal Transparency Report) — Америка кўмагидан фойдаланадиган 140 дан ортиқ мамлакатнинг бюджет шаффофлиги бўйича шарҳини эълон қилди. Баҳоланган 139 та ҳукуматдан 73 таси минимал талабларга жавоб берган, қолганларидан яна 14 таси эса ҳисобот даврида сезиларли прогресс кўрсатган деб қайд этилган. Аввалроқ кўтарилган мавзуга қайтадиган бўлсак, солиқ сиёсати — бу нафақат ички маъмурий бошқарув масаласи, балки халқаро ҳамкорлар ва инвесторлар мамлакатнинг барқарорлиги ҳамда прогноз қилинувчанлигини баҳолайдиган кенг қамровли жараённинг бир қисмидир. АҚШ Давлат департаментининг ҳисобот эълон қилинишига бағишланган расмий пресс-релизида таъкидланганидек, бюджет шаффофлиги давлат молиясини самарали бошқаришнинг муҳим элементи ҳисобланади: у бозорлардаги ишончни мустаҳкамлашга ёрдам беради, глобал иқтисодий барқарорликнинг асосини ташкил этади ва Америка компаниялари учун рақобат шароитларини тенглаштиради. Ушбу таъриф жуда аниқ ва у фақат Америка компанияларига эмас, балки бошқа халқаро бизнес вакилларига ҳам тааллуқлидир. Бу ерда нафақат алоҳида бюджет ҳужжатларининг шаффофлиги, балки режалаштиришнинг вақт уфқи (истиқболи) ҳам муҳим. 3 ёки 5 йиллик фискал режа кўринишидаги ўрта муддатли режалаштириш солиқ сиёсати ҳақидаги суҳбатни «кейинги чоракда нима ўзгаради?» даражасидан «мамлакат бир неча йил ичида қайси йўналишда ҳаракатланмоқда?» даражасига олиб чиқадиган воситадир. Айнан шундай вақт уфқи инвесторга рискларни ўз молиявий моделига киритиш ва таваккалчиликка йўл қўймасдан қарор қабул қилиш имконини беради. Тушунарли ва барқарор Солиқ кодекси бу шунчаки ички техник ислоҳот эмас. Бу ташқи дунёга бериладиган сигналдир: ўйин қоидалари чоракдан чоракка ўзгармайди, демак, ушбу юрисдикция билан узоқ муддатли режалар тузиш мумкин. Айнан ўрта муддатли бюджет режалаштириш билан мустаҳкамланган прогноз қилинувчанлик мамлакатнинг халқаро майдондаги обрўсини шакллантиради ва натижада қарз олиш қийматига, стратегик инвесторларнинг қизиқишига ҳамда якуний кредит рейтингларига ижобий таъсир кўрсатади.