Ўзбек банк тизими 2018 йилни 16,2%, 2019 йилни эса 16,7% капитал рентабеллиги билан якунлаган. 10 сентябрда ўтказилган матбуот анжуманида банкларнинг капитал рентабеллиги 10 фоизгача пасайгани айтиб ўтилди. Йил охиригача қолган 4 ой давомида ўзбек банкларини анча-мунча мураккабликлар, хусусан маржиналликни пасайиши ва активлар бўйича йўқотишларни баҳолаш кутаётгани инобатга олинса, йиллик рентабеллик янаям пастроқ бўлиши мумкин. Банклар капитали сўмда шаклланганидан келиб чиқилса, бусиз ҳам бозор қиймати юқори бўлмаган ўзбек банклари капиталининг реал қиймати қадрсизланиши ҳам рўй бермоқда. Фоиз риски билан боғлиқ даромадларни кўпайтиришда эса банклар қўли боғланган: Ўзбек банклари қатор банк хизматларини бепул қилиш ва айрим хизматлар бўйича тарифларнинг энг юқори даражасини чеклаш тўғрисида Меморандум имзолашга мажбур бўлишган. Албатта буни ҳеч ким тан олмайди ва рад ҳам этмайди. Шундай вазият юзага келмоқдаки, қачонлардир оҳанграбо сингари пулдорларни ўзига тортган ва легал соҳалар ичида энг рентабеллилардан бўлган банк иши ўзининг инвестициявий жозибадорлигини йўқотмоқда. Бу ҳолат давлат тасарруфидаги банкларни кенг кўламда хусусийлаштириш арафасида турган Ўзбекистон учун яна битта синов бўлади. @the_bakiroo