Банк тизими даромадлилиги охирги уч йилда биринчи марта инфляция суръатидан ошган Марказий банк банк тизими даромадлилиги таҳлили маълумотларини эълон қилган. 2022 йил якунлари бўйича Ўзбекистон банк тизими капитал рентабеллиги 13,3%ни ташкил этган. Бу расмий инфляция кўрсаткичидан (12,3%) бир фоиз бандига баланд. Мазкур ижобийлик 2019 йилдан буён биринчи марта рўй берган. Маълумот учун, 2020 йилда инфляция 11,1%ни ташкил этган, банк тизими рентабеллиги эса 10,3%дан иборат бўлган. 2021 йилда инфляция 10,0%ни ташкил этган ҳолда банк тизими атига 6,1%лик рентабеллик қайд этган. Яъни мутлақ назорати давлат ихтиёрида ва маъмурчилигида бўлган ўзбек банк тизими ўзининг капиталини фақат қадрсизлантириб, емириб борган.