Чет эл инвестициясини олиб кириш, инвесторларни жалб қилиш энг катта минбарлардан туриб гапирилади. Бунинг учун масъул раҳбарлардан керак бўлса, тун-у кун ишлаш талаб қилинмоқда. Бу қанчалик муҳим масала эканини шундан ҳам англаб олиш мумкин. Аммо шундай ҳолатлар борки, дилни хира қилмасдан қолмайди. Яқинда Kun.uz ва Human.uz интернет нашрларида муҳим суриштирув чоп этилибди. Мақолани ўқиб (ёки видеотасвирларни кўриб) шуни тушуниш мумкинки, инвестор Тошкент шаҳар ҳокимлиги билан хорижий инвестиция эвазига бошланган лойиҳаси устида келишув имзолайди. Бироқ орадан кўп ўтмай, кутилмаганда турли важлар билан айрим мутасаддилар ушбу келишувни бекор қилишга уринишиб, инвесторга турли муаммолар туғдирадиган ҳаракатларни амалга ошира бошлашади. Эътиборли жиҳати шундаки, ҳокимликнинг инвесторга қўяётган қатор шартлари дастлабки келишувни тамоман инкор этади. Бу масала юзасидан ноилож инвестор тегишли жойларга мурожаат билан ҳам чиққан, аммо ҳозирча инвесторга ҳеч қандай кўмак кўрсатилгани йўқ. Унинг ўрнига эса ҳокимлик мутасаддиларининг босимларига дуч келмоқда. Хўш, давлат раҳбари, ҳукумат томонидан чиқарилаётган шунча ҳужжатлар, берилаётган топшириқлар, раҳбарлар томонидан айтилаётган гаплар ўша жойида қолмоқдами?! Қонун-қарорларнинг ижросини таъминлашга қуйи бўғиндаги масъул ходимлар юқоридаги ҳолат каби ўз вазифаларини суиистеъмол қилишда қачонгача давом этишади?! Афсуски, қанча ҳаракат қилинмасин, қанча гапирилмасин, ҳозиргача мана шу каби ҳолатлар такрорланишда давом этмоқда. Муаммо шундаки, ҳаммаси фақат юқоридан бўлган гап билан ҳал бўлиб қолмайди. Қуйи бўғинларда ишлаётган масъуллар ўзгармас экан ҳаммаси «эски ҳаммом эски тосдек» кўринаверади.