Анжанчасига Эсингизда бўлса, давлат қишлоқ хўжалигидан буткул кетмагунича мажбурий меҳнат давом этавериши, мажбурлаш турлича гибрид кўринишлар олиши ҳақида ёзган эдик. Бу йилги мавсумда мажбурий меҳнат қандай шаклда амалга оширилиши ҳақида тўхталиб, вилоят ва туманлар ҳокимликларининг тақсимотига кўра мулкчилик шаклидан қатъий назар ҳар бир ташкилот теримга одам ажратиши, тақсимотларнинг ҳеч бирига ҳокимлар имзо чекмаслиги, лекин бажариш мажбурий гибрид "тизим" яратилишини кутгандик. Қарангки, амалда айнан шундай бўлиб чиқди ва чиқмоқда ҳам. Вилоят ҳокими вилоятнинг пешанасига битган бахти бўлган Андижонда вилоят ташкилотлари мажбурий меҳнат учун бериши лозим бўлган юклама тақсимланган. Уларга кунлик норма, режа белгиланган. Отрядларигача, қайси фермер даласида ишлашигача кўрсатилган. Агар одам чиқармаса кунлик солиғи - 1 та одамга 50 минг сўмни қуртдай тўлаб қўйиши керак. Эътиборлиси, вилоятдаги зўравонлик, қонунсизлик ва ноқонуний топшириқлардан безгани ортидан ёпиб юборилган айрим банкларга ҳам мажбурий меҳнат учун одам бериш талаб қилинган. Албатта, асло бундай эмаслиги, вилоят ташкилотлари ҳаммаси ўзлари хоҳлаб вилоят ҳирмонига камарбаста бўлаётгани айтилади. Қасамлар ичилади. Репортажлар қилинади. Биринчи марта эмас. Бошқача деб кўрсин-чи, вилоятда ишлаш тугул, яшашга қўймайди.