Бизнинг ҳам суверен фондимиз бор Норвегиянинг суверен фонди 2020 йилнинг 3- чорагида 44,3 миллиард доллар фойда ишлаб топгани ҳақида ёзмоқда Reuters. Гап шундаки, табиий ресурсларга бой ва шунга яраша халқи фаровон Норвегия сингари, бизнинг ҳам ўз суверен фондимиз бор. У 2006 йилда ташкил этилган Тикланиш ва тараққиёт жамғармаси ҳисобланади. Жамғарманинг маблағлари асосан стратегик ресурсларга белгиланадиган чегара нархдан (масалан олтин, уран, кимё, энергоресурслар) жаҳон нархининг ошиши натижасида тушадиган маблағлар ҳисобидан шаклланади. Белгиланган қоидаларга кўра, Жамғарма маблағлари ёқилғи-энергетика комплекси, кимё саноати, машинасозлик, рангли металлургия ва иқтисодиётнинг бошқа базавий тармоқларида, шунингдек транспорт ва телекоммуникация соҳасида ривожланиш давлат дастурларига киритилган ғоят муҳим лойиҳаларни молиялаштиришга йўналтирилиши керак. Боинг ва Айрбас самолетларини сотиб олиш, ИЭСлар реконструкцияси, Сургиль конини ўзлаштириш, Талко поездларини олиб келиш каби гигант лойиҳалар айни шу жамғарма етовида молиялаштирилган. Айни пайтда деярли барча давлат банкларининг мутлақ назорат пакетига эгалик қилади, давлат банкларининг энг катта кредитори ҳам айнан Тикланиш ва тараққиёт жамғармаси. Кейинги йилларда мамлакатда ўзлаштириш учун нимаики лойиҳа ўйлаб топилса, масалан, "Ҳар бир оила тадбиркор" каби, албатта Тикланиш ва тараққиёт жамғармасига кўз тикилади. Жамғарма активлари, мажбуриятлари ва молиявий натижаларини охирги марта 2018 йил якунлари бўйича очиқлаган. Унга кўра, қарийб 210 триллионлик активлар билан 5,5 трлн.сўм соф фойда ишлаб топилган. Яъни суверен фондимизнинг йиллик рентабеллиги 2,6% атрофида бўлган. Солиштириш учун: 2017 йилни Жамғарма 203 трлн.сўмлик активлар ва 87 трлн.сўм соф фойда билан якунлаган ёки йиллик 43%лик рентабеллик таъминланган. Ўта барқарор кечган 2018 йилда Соф фойданинг 15 баробар тушиб кетгани активлар сифати ёмонлашгани билан боғлиқми ёки активлар даромадлиги пасайгани билан-ми, бир нима дейиш қийин. Жамғарма 2019 йил ва 2020 йилнинг ўтган даврлари бўйича ҳисоботларини эълон қилмаган.