Иккинчи ой кетма-кет олтин экспорт қилинмаяпти, лекин импорт жадал суръатларда ўсишда давом этмоқда. Эълон қилинган ташқи савдо статистикасига кўра, 2020 йилнинг 10 ойи давомида экспорт 13 329,1 млн.долларга, импорт 16 730,3 млн.долларга етган. Импортни, айниқса давлат назорати остидаги корхоналарнинг импортини нотариф чоралар билан чеклаш тадбирлари ўзининг самарасини бераётгани йўқ. Агар Статистика Қўмитаси импорт мундарижасини давлат назорати ва хусусий субъектлар қирқимида эълон қилганида ҳаммаси очиқ намоён бўлган бўларди. Ўзбекистонда Ўз билан бошланадиган давлат компаниялари импорт битимларини тузишда асоссиз равишда қимматроқ бўлган шартларда ускуна, эҳтиёт қисм ва хом-ашё келтиришга муккасидан кетиб қолган. Уларнинг импорт самарадорлигини директив чекловлар ўрнатиб, корпоратив бошқарувга хориждан бир неча ўн минг долларлик маош билан экспертлар ва менежерлар келтириб, ребрендинг қилиб ўзгартириб бўлмайди. Бу корхоналар бутун мундарижаси ва табиати бўйича фақат ва фақат ўзлаштиришга ва максимал даражада ўзлаштиришдан ўзгасига ярамайди.