Амалдорларнинг монетизация қилиниши лозим бўлган имтиёзлари ҳақида. Иккинчи қисм Нима бўлгандаям, бу имтиёзларнинг барчаси монетизация қилиниши керак, соддароқ айтганда, шу имтиёзларга кетаётган барча харажатлар пулга чақилиб, чиновникка маош кўринишида берилиши лозим. Бу нима дегани? Масалан, амалдор йилига 24 млн.сўмлик бепул имтиёзли тиббий хизмат олади, 20 йилда 1 млрд. сўмлик хизмат уйидан фойдаланади, 10 йиллик пенсия даврида пенсия билан боғлиқ 120 млн сўмлик устамаларга эга бўлади, дейлик. Шунда ҳар ойда амалдорнинг монетизация қилиниши лозим бўлган маоши 8 млн.сўм чиқади дегани, бошқача айтганда амалдор юқоридаги барча имтиёзлардан маҳрум қилиниши ва унинг маошига 8 млн.сўм қўшиб берилиши керак. Шунда амалдорларгаям, солиқ тўловчи халққаям нисбатан тўғри, шаффоф ва ҳаққоний иш бўлади. Бу энди моҳиятни осон тушунтириш учун умумийлаштирилган рақамлар. Амалда бутунлай бошқа рақамлар бўлиши мумкин. Лекин моҳият ўзгармайди. Амалдорларнинг маошлари паритетини ҳеч қачон хусусий сектор менежменти маошлари билан солиштирмаслик лозим. Бутун дунёда кимки 2-3 баробар юқори маош истаса хусусий секторга ўтади, агар нормал дунёда амал қиладиган паритетлар қўлланилса, масалан, Ўзбекистонда йирик хусусий компаниялар топ менежментида ойлик маош 10-15 минг доллар бўлса, демак давлат секторидаги унга мос келувчи паритет - вазирларнинг маошлари ундан 2-3 баробар кам бўлиши керак. Шу билан бирга, монетизация қилинган ва юқори маошлар амалдордан шаффофлик ва ҳисобдорликда бўлишни ҳар қадамда талаб қилинади. Масалан, тармоқ вазирининг хусусий компания тегишли самолетда учиши бу пора, артистларнинг амалдорнинг тўйида бепул хизмат кўрсатиши бу пора,10 доллардан ортиқ совға бу пора, аукцион ва конкурсларда амалдорга аффилланган компанияларнинг қатнашиши, тақдим этилиши ва ютиб чиқиши бу мансаб ваколатини суистеъмол қилиниши, демакки молиявий жиноят. Ва ҳакозо ва ҳакозо. Халқ ва амалдорлар шунга тайёрми? Бунинг учун халқ ва амалдорлар ўртасидаги аллақачон эскирган жамоат шартномасини янгилаш керак бўлади. Бугун дам олиш куни. Фикримиз янаям тушунарли бўлиши учун ҳаволадаги ҳазил томошани тавсия этаман. Табассум қилинг ва фикрланг. @the_bakiroo