Айрим муносабатларга муносабат Сафоев билан интервьюни кўрдим. Интервью яхши чиққан, гарчи Сафоев мулоҳазали дипломат бўлсада, қарашларини, рости-рустини очиқлашдан ийманиб ўтирмаган. 1991 йилда мамлакатимиз номи Туркистон деб аталиши кун тартибида бўлганини ҳатто тарихчилар ҳам шивирлаб айтишади, ёки 2016 йил сентябрдаги саволли бир ҳафта, танлов қандай амалга ошгани ҳақида апокрифга айланган мулоҳазаларни муҳокама этишга ҳар ким ҳам журъат эта олмайди. Интервьюдан бизни яқин келажакда кутаётган кўп ўзгаришларга сигналларни, ҳаттоки манифестни кўриш мумкин. Албатта айрим муносабатларга, гарчи у Ўзбекистоннинг ақлли юзидан чиқаётган бўлсада, муносабатни аниқлаштириб, фиксация қилиб қўйган яхши. Масалан, мен Россия билан асрлар давомида бир маконда бўлганимиз ва бу биз учун муқобили йўқ вектор экани ҳақида гапларга асло қўшилмайман. Россия Марказий осиёни босиб олиб, ўз мустамлакасига айлантиргандан кейингина, биз у билан 130 йил бир маконда бўлишга мажбур бўлганмиз. Каримов 25 йил давомида шу орбитадан чиқиб кетишга ҳаракат қилди ва яна бир авлод умри давомида бу сиёсат давом этганида биз буни уддалашимиз мумкин бўларди. Афсуски, янги замонда тескари ҳаракат кетмоқда. Марказий осиё интеграцияси айни замон ва маконда имконсизлиги ҳақида гаплар ҳам ўта баҳсли. Шахсан мен айнан Марказий осиё интеграцияси, айниқса Қозоғистон билан бошланадиган узвийлик, келажак ва тараққиёт учун ягона муқобил йўл деб ҳисоблайман. Агар биз давлатчилик, миллат ва ўзликни сақлаб қолишни, сақлаб қолгандаям, жаҳон тамаддунидан тушиб қолмай, рус ё хитой цивилизациясининг бир қисмига айланиб кетишни истамасак, ягона йўл шу. @the_bankiroff