Ўзбек сўми 1-чоракни АҚШ долларига нисбатан мустаҳкамланган ҳолда якунламоқда Эртага, 31 март куни 1 АҚШ долларининг расмий қиймати 10 474,98 сўмни ташкил этади. 2021 йилни доллар/сўм жуфтлиги 10 476,92 сўмлик қиймат билан бошлагани инобатга олинса, миллий валютамиз йилнинг 1- чорагини мустаҳкамланган ҳолда якунлаётгани маълум бўлади. Ўзбек сўми ўтган 90 кунни нафақат АҚШ долларига, евро, Британия фунт-стерлинги, Япония иенаси, Хитой юани, Россия рубли ва Қозоғистон тенгесига нисбатан ҳам қадрини бирмунча оширган. Охирги марта ўзбек сўми чоракни мустаҳкамлаган ҳолда якунлаши 2018 йил 2- чорагида юз берганди, ўшанда сўм АҚШ долларига нисбатан чорак давомида деярли 3%га қимматлаган эди. Сўмнинг жорий мустаҳкамланиши экспортнинг қисқариши давом этаётган, ташқи савдо салбий сальдоси ўсиши кузатилаётган ва олтин-валюта захиралари қисқараётган бир вақтда юз бераётганлиги алоҳида эътиборга молик. @the_bankiroff