Ўзбекистонликларга жуда қимматга тушаётган Ангрен шина заводи учун Ўзкимёсаноат баёнот берипти Расмий номи «BIRINCHI REZINOTEXNIKA ZAVODI» МЧЖ бўлган Ангрен шина заводи бўйича шу кунларда муҳокамада бўлиб турган масалага Ўзкимёсаноат баёнот билдирипти. «BIRINCHI REZINOTEXNIKA ZAVODI» МЧЖга 100%лик давлат назорати Ўзкимёсаноатга тегишли. Ҳозирда «BIRINCHI REZINOTEXNIKA ZAVODI» МЧЖга директорлик қилаётган Ғуломжон Ибрагимов аввал Ўзкимёсаноатда раҳбар бўлган. Баёнотга тўхталсак. Жуда узун ва алмойи-жалмойи ёзилган матнда заводга қўйилаётган энг асосий эътироз - унинг иқтисодий самарасиз экани борасидаги саволларга биронта жавоб йўқ. Завод 2020 йилни қанча зарар билан якунлади? Коронавирусдан ўлаётганларни даволаш учун олинган ташқи қарзлардан заводга берилган миллиардлар қай мақсадда ишлатилди? Ташқи қарз қайси манбалар ҳисобига сўндирилмоқда? 288,6 минг долларлик экспорт ҳисобига дея кўрманг, бу кулгули, қарзнинг фоизи тугул турли комиссияларини қоплашга етмайди. Дарвоқе, пул тўлаб, ойлаб кутиб Дамас олаётганларга сабр-тоқат тилайман: сентябрдан бошлаб Дамас автомашиналари учун заводнинг шиналари қўйила бошлар экан. Салондан тўғри бозорга ўтаверасизлар. Маҳаллийлаштириш лўттивозликларини оқлаш учун 2 йил аввал, айнан аввал бошдан самарасизлиги аниқ бўлган Ангрен шина заводи манфаатлари учун ҳар бир импорт қилинган шина учун, 10% лекин 3 доллардан кам бўлмаган миқдорда бож киритилган. Заводнинг ўзи тўлиқ ишлаётгани йўқ, бор бўлсаям ишлаб чиқарган маҳсулотини фақат аравага тиркашга муносиб, лекин ўзбекистонликлар ҳар бир импорт шина учун 2 йилдан бери 3 доллардан бож тўлаб келишаяпти. Мана шунақа бизнинг бўйнимизга, бусиз ҳам оғирлашиб бораётган ҳаётимизга ва эртанги кунда фарзандларимиз учун ҳам товон бўладиган самарасизлик дегани Ангрен шина заводи. Бу самарасизлик учун жавобгарлик албатта бўлиши лозим ва лобуд! P.S. Бу завод самарасиз эканини миллионларни ўзлаштираётганларнинг ўзлари ҳам жуда яхши билади. Шунинг учун улар ҳатто эски, ишлатилган шиналарга ҳам бож ўрнатишган. Бошқача айтганда заводнинг шиналари ҳатто эски, ишлатилган шиналарга ҳам очиқ рақобатда дош бера олмайди. Тармоқда ёзишаяпти: Яна бир қизиқ томони агар ҳалиям ўзгармаган бўлса, Ўзбекистонга кириб келадиган шинани айнан уларни сертификати билан олиб кириш мумкин. Тасаввур қилинг, фақат сиз нон ишлаб чиқарасиз ва четдан нон кирмоқчи бўлса сиздан рухсат олиш керак. Сиз йўқ десангиз, опкиролмайди) @the_bankiroff