Автомобиль шиналари учун утилизация йиғими жорий этилади. Хавотирлар бор! Автомобиль шиналарини утилизация қилишда табиатга зарар етказилаётганлиги ҳамда ушбу йиғимдан тушган маблағлар ижтимоий аҳамиятга эга дастурларни молиялаштиришга йўналтириш мақсадида, 2024 йил 1 июлдан бошлаб автомобиль шиналарининг бир донаси вазнидан (кг учун) келиб чиққан ҳолда базавий ҳисоблаш миқдорининг 0,3 фоизи миқдорида утилизация йиғимини жорий этиш режалаштирилмоқда. Қайд этилишича, шиналарнинг ўртача вазнидан келиб чиққан ҳолда утилизация йиғими миқдори енгил автомобиллар учун ўлчами R13дан R20гача бўлган шиналарига 6,2 минг сўмдан 16,2 минг сўмгача, юк автомобиллар учун ўлчами R16дан R18гача бўлган шиналарга 11,3 минг сўмдан 58,8 минг сўмгача ташкил этади. Қўрқув ва хавотир шундаки, автомобиль шиналари учун утилизация йиғими фақат импорт шиналардан ундирилади. Масалан, иқтисодий самарасизлик ва пул ўзлаштириш намунасига айланиб улгурган Биринчи резинотехника заводи ишлаб чиқарган шиналардан утилизация йиғими ундирилмайди. Ким кафолат беради автошиналар учун утилизация йиғимини тўламаслик юзасидан Биринчи резинотехника заводига ёпиқ қарор билан истисно берилмаслигига? Ахир автомобиллар учун утилизация йиғими борасида худди шундай бўлдику! Бошқа ҳамма тўлайди. Ёпиқ қарор билан истисно берилгани учун Ўзавтосаноат утилизация йиғимини тўламайди (Ўзавтосаноат бюджетга тўламаётган утилизация йиғими бир неча ўн триллион сўмдан ошиб кетган). Ўзбекистонликларга 160 млн.долларга тушган ва металлолом пулида ўрисга сотилган Биринчи резинотехника заводига билвосита ёрдам кўрсатишга уринишлар биринчиси эмас. Биз ҳали унутганимиз йўқ Коронавирусдан ўлаётганларни даволаш учун олинган ташқи қарзлардан заводга берилган миллиардларни. Биз ҳали унутганимиз йўқ маҳаллийлаштириш лўттивозликларини оқлаш учун аввал бошдан самарасизлиги аниқ бўлган шина заводи манфаатлари учун ҳар бир импорт қилинган шина учун, 20%, лекин 5 доллардан кам бўлмаган миқдорда, ҳаттоки эски шиналарга рақобат қила олмагани учун 30%, лекин 7 доллардан кам бўлмаган божлар киритилганини. Ўзбекистонликлар нега қирғиз ва қозоққа машинаси билан чиқиб келишади, мишлен шиналари қўйилган мерседесда юрадиган корчалонлар қайдан билсин?