Ўсаётганлар ва ортда қолаётганлар Тижорат банклари фаолиятининг асосий кўрсаткичларига эътибор қаратилса, ўзаро рақобатда ўсаётган ва ортда қолаётган банкларни қайд этиш мумкин бўлади. 2021 йилнинг ўтган даврида Ўзбекистон банк тизимида бозордаги улушини шиддат билан ошира олган банк бу - Тенге банк. Банкнинг активлар бўйича бозор улуши бирданига 0,2%га, капитал бўйича эса 1,3%га ўсган. Бир чорак учун бу жуда катта кўрсаткич. Агар банк капиталини бирданига 817 млрд.сўмга оширгани инобатга олинса, 2- чоракда ва бутун йил давомида Тенге банк фаолият майдонини кенгайтиришда ва рақобатчиларнинг улушига ҳужум қилишда давом этишини кутиш мумкин. Активлар бўйича бозордаги улушнинг энг катта пасайиши Миллий банк билан юз берган (-0,7%). Банк бозорининг мутлақ лидери учун бу албатта сезиларли бўлмаслиги мумкин. Депозитлар қолдиғининг энг катта пасайиши давлат банклари ичида Асакабанкда (-2 051 млрд.сўм), хусусий банклар орасида эса Давр банкда (-139 млрд.сўм) юз берган. Депозитлар қолдиғининг энг катта ўсиши давлат банклари орасида Миллий банкда (+920 млрд.сўм) ва хусусий банклар орасида эса Трастбанкда (+165 млрд.сўм) кузатилган. Яна бир қизиқ жиҳат, биринчи марта чорак давомида давлат банкларида депозитлар қолдиғини ўсиши фонида хусусий банкларда эса камайиши қайд этилган. Бошқача айтганда депозитларнинг давлат банклар томон оқиши, жамланиши юз бермоқда. Давлат банклари орасида кредит портфелининг ўсиши бўйича қишлоқ хўжалигини мавсумий кредитлаш бошлангани туфайли Агробанк етакчи бўлган (+2 149 млрд.сўм). Хусусий банклар ичида эса Капиталбанк (+619 млрд.сўм). Кредит қўйилмалари энг кўп қисқариши давлат банклари орасида Миллий банк (-687 млрд.сўм) ва хусусийлар орасида КДБ банк (-98 млрд.сўм) қайд этилган.