Депозитларнинг ўсиши май ойида янада фаоллашган Тижорат банкларининг жами депозитлари ўтган ойда 7,5%га ўсиб, 173,9 трлн.сўмга етган. Май ойида ўсиш фаоллигини корпоратив депозитлар, айниқса Миллий банкда (+7,5 трлн.сўм) депозитлар қолдиғининг кескин ўсиши белгилаган. Хусусий банклар орасида Капиталбанк йил бошидан буён депозит базасини жуда катта тезликда кенгайтирмоқда. Май ойида мазкур банк депозит портфелини 1,5 трлн.сўмга кўпайтирган. Капиталбанк барча банклар орасида депозитлар қолдиғи бўйича Миллий банкдан кейинги иккинчи ўринга мустаҳкам жойлашиб олган. Шу икки банк ўзининг сегментида бошқа банклардан кескин илгарилаб кетган. Давлат банклари орасида шунингдек, Ипотекабанк (+714 млрд.сўм), Агробанк (+414 млрд.сўм) ва Қишлоққурилишбанк (+243 млрд.сўм) депозит портфеллари барқарор ўсишда давом этаяпти. Хусусийлардан Азия Альянс банк (+412 млрд.сўм), ЎзКДБ банк (+384 млрд.сўм) ва Анорбанк (+316 млрд.сўм) май ойида депозит бозоридаги фаоллардан бўлишган.