Депозитларнинг қолдиғи юқори суръатда ўсишда давом этмоқда Гарчи кредит қўйилмалари июнь ойида қисқарганига қарамай, тижорат банкларининг депозит портфели жуда юқори суръатда ўсишда давом этмоқда. Ой давомида жами депозитлар 11,2 трлн.сўмга, хусусан чакана депозитлар 4,7 трлн.сўмга, корпоратив депозитлар эса 6,5 трлн.сўмга кўпайган. Давлат банклари орасида Миллийбанк (+4,9 трлн.сўм), Ўзсаноатқурилишбанк (+1,3 трлн.сўм) ва Агробанк (+556 млрд.сўм) ўта фаол бўлишган. Хусусий банклар орасида эса Капиталбанк (+2,5 трлн.сўм) бир неча ойдан бери депозит бозорини эгаллашда етакчиликни ҳеч кимга бермай келмоқда. Июнь ойида хусусийлардан, шунингдек, Ипак йўли банки (+535 млрд.сўм) ва Ҳамкорбанк (+449 млрд.сўм) яхши натижалар кўрсатишган. Депозит жамғаришда онлайн банкларнинг фаоллиги анча сусайган, омонатлар яна анъанавий банклар тарафга оқиб бормоқда. Яна бир эътиборли ҳолат шуки, пул таклифи ва депозитлар қолдиғи кўпайиб бораётганига қарамай депозит бозоридаги нархлар пасаймаяпти, балки бу банкларда юқори фоизли кредитларга (масалан, тижорий ипотека, микроқарзлар ва автокредитлар) талаб юқори қолаётгани ва инфляцион кутилмалар билан боғлиқ бўлиши мумкин.