Ҳозирча ҳаммаси базавий сценарий бўйича кетмоқда "2021 йилнинг I чораги учун пул-кредит сиёсати шарҳи" тақдим этилди. Регуляторга кўра, биринчи чоракда юз берган воқеликлардан келиб чиқилса, шаклланган иқтисодий ҳолат макроиқтисодий прогнозларнинг базавий сценарийсига тўғри келмоқда. Шу билан бирга шарҳда асосий озиқ-овқат маҳсулотлари бўйича кутилмалар ҳам қайд этилган. Масалан, айтилишича, шу кунларда юқори суръатда қимматлаётган буғдойнинг ўртача нархи йил охиригача тоннасига 290 доллардан 250 долларгача пасайиши мумкин. Вакцинациялаш кўлами ва унинг иқтисодий ўсишга таъсири ҳам баҳоланган. Регуляторга кўра, вакциналаш суръати қанчалик юқори бўлса иқтисодий фаолликнинг тикланиши, иқтисодий ўсиш суръатларининг инқирозгача бўлган даражасига қайтиши шунчалик тезроқ амалга ошади.