Агрессор ва собиқ империяни тиклаш режаларини очиқ-ойдин айтаётган давлат билан бизнинг манфаатлар доирасида ҳамкорлик мумкинми? Чехословакия аннексияси, Австрия аншлюси ва Польшага ҳужумдан кейин 1940 йилда Гитлер Германияси билан ҳамкорлик мумкинмиди? Бундай ҳамкорликка борган давлат ўзининг манфаатларини ифода эта олармиди? Йўқ, йўқ ва яна йўқ. Гитлер Германияси билан ҳарбий ҳамкорликка борган бирон давлат агрессиядан ўз хавфсизлигини кафолатлай олганми? Шундай экан, Россия билан 2025 йилгача ҳарбий соҳада стратегик ҳамкорликдан хавотир олишимиз табиий ва бу хавотирларимиз кундан-кунга кучайса кучаядики, асло енгиллашмайди. Гарчи мамлакат Мудофаа вазирлиги ҳамкорлик дастури имзоланишидан хавотирланиш «мутлақо асоссиз» эканини ўн марта қайта такрорласа ҳам. Халқдан яшириб қўйилган "Ташқи сиёсат концепцияси"га ҳавола ҳам бу хавотирларни тарқатиб юбормайди. "Ташқи сиёсат концепцияси" мавжудлиги ЕОИИнинг қўйнига кириб кетишга тўсқинлик қила олмади, зеро концепция феълан сиёсий мақсадлардаги иттифоқларни тўғридан тўғри тақиқлайди. Дарвоқе, эсда тутиш лозимки, потенциал агрессор билан тузиладиган ҳар қандай шартнома агрессор учун ўша шартнома қайд этиладиган қоғозчалик қийматга эга эмас. Тарих такрорланаверади.