Ташқи савдо ўсмоқда, лекин 2019 йил тегишли даври даражасига чиқа олгани йўқ 2021 йилнинг ўтган 5 ойи давомида ташқи савдо ҳажми 2020 йилнинг тегишли даврига нисбатан 13,2%гача ўсган ва 14,6 млрд.долларни ташкил этган. Лекин бу кўрсаткич 2019 йилнинг 5 ойи кўрсаткичидан 5,5%га кам. Яъни ўсиш ибораси ўрнига ташқи савдонинг тикланиши деган атама билан атасак тўғрироқ бўлади. Тикланиш жараёнида охирги 9 ойда биринчи марта қулай фурсатдан фойдаланиб, 1,2 млрд.долларлик олтин сотилгани ҳам катта ўринга эга бўлган. Ўтган сафар ҳам бу ҳақида таъкидланган эди. 2020 йилнинг 5 ойи экспорти ҳажми ўтган йили эълон қилинган ва бу йилги маълумотларда 100 млн.доллардан ортиқ суммага фарқланмоқда. Агар бу корректировка бўлса, унинг сабаблари ва манбалари кўрсатилиб, расман бу ҳақда маълум қилиниши лозим.